Se ou menm ki te konn bat bas la jiskaske kòd yo te konn kase pèt-pètèp-pèt. De ran san te konn koule nan men-w, epi se ri ou te konn ri sa.
Tout lòt mizisyen/mizisyèn yo te oblije kontinye jwe jiskaske rit la te rann lwil anba yon melodi san kòmansman san fen, yon priyè san amèn. Tanbourinè yo menm, se pale yo te konn fè tanbou pale. Mwen kòmanse granmoun men memwa a la toujou.
Ou konnen se gwo fanatik tout atis ayisyen tout kote mwen ye. Gen de istwa ki bay chagren. Men, si se sou yon tablo istwa sa pentire, si se sou yon ti bout mizik istwa sa chita, si se sou yon paj istwa sa ekri. . . nou ka etidye tablo a, nou ka danse mizik la; si nou ka li, nou li ti liv la. Lespri nou va respire yon lòt lè.
Moso pa moso nou viv ti kilti nou. Moso pa moso nou pataje ak moun ki damou bèl ti kilti nou. Se devwa atis jodiya pou kontinye travay ke tout gwo mesyedam yo te kite pou nou. Atis lontan yo te rann anpil san sou teren kiltirèl la. Moun sa yo te soufri anpil pou mizik, penti, ak literati: Sa ki te pran ekzil; sa ki te desann anba tè. . . Nou dwe konprann ke lespri atis se bagay ki toumante fasil.
Gen dokiman soti anba tè rive jis dèyè syèl la o sijè de mizè atis ayisyen manje. Gen dokiman ki pa gen dwa janm efase menmsi yo pa t ekri sou moso papye.
“Jou a rive pou nou respire yon lòt lè,” Eddy François di sa sou ti CD Boukan Ginen’m nan.
Jou a rive pou tout atis ayisyen voye monte jiskaske etènite pote kò yo ale. Pentire, chante! Ekriven ayisyen, fè kreyon-w galope tankou chwal.
Pawòl serye. Sa ki konn fè tablo, fè tablo. Sa ki konn danse, kanpe sou pwent zotèy ou; vire sou de talon-w; voye kongo monte!
Ayisyen eritye anpil sou baz kiltirèl la. Jodiya, se devwa atis yo pou kite plis pou jenerasyon ka p vini an.
Bigaud, Obin, Bazile, Benoit . . . chedèv yo fann an de douz janvye. Men, se pa Katedral sèlman ki kraze. Gen travay. Wi, gen travay! Atis Ayisyen toupatou, kenbe djanm. Pitit-pitit-pitit ou ap tann ou.